Ky është rasti i 14-të i identifikuar në SHBA këtë vit, por i pari në të cilin pacienti nuk ka pasur kontakt me një kafshë apo zog të infektuar
Autoritetet shëndetësore amerikane njoftuan se një pacient është konfirmuar nga analizat laboratorike se ishte infektuar me gripin e shpendëve pa pasur asnjë kontakt me një shpend bartës, një rast pa precedent në SHBA, raporton noa.al.
Deri dje, rastet e gripit të shpendëve që ishin konstatuar në vend kishin lidhje me botën blegtorale. Por zbulimi i 22 gushtit që u publikua zyrtarisht të premten 6 shtator, ngriti pyetje për autoritetet amerikane, të cilët kërkuan që të kryheshin teste shtesë.
Rezultati doli se ishte vërtet një rast i gripit të shpendëve, thanë ata në një deklaratë për shtyp të publikuar nga Qendrat Federale për Parandalimin dhe Kontrollin e Sëmundjeve (CDC) dhe autoritetet lokale shëndetësore të këtij shteti të Amerikës Qendrore.
“Asnjë rast i transmetimit përmes kontaktit të ngushtë (të pacientit) nuk ishte identifikuar,” tha CDC. Ky është rasti i 14-të i identifikuar në SHBA këtë vit dhe i pari në të cilin pacienti nuk ka pasur kontakt të njohur me një kafshë apo zog të infektuar.
Prej pranverës, në vend ka ndodhur një epidemi e gripit të shpendëve, me karakteristika të pazakonta: sëmundja, e cila prek mbi të gjitha shpendët e kultivuar dhe të egër, tashmë po përhapet edhe te lopët. Rasti i parë, në Teksas, në jug të SHBA, u njoftua më 1 prill. Ishte rasti i parë i njohur në botë i virusit të gripit të shpendëve që u transmetua nga një lopë te njeriu.
Megjithatë, asnjë rast i sëmundjes nuk është raportuar në lopët e rritura kryesisht për qumështin e tyre në Misuri.
Ekspertët janë të shqetësuar për rritjen e numrit të gjitarëve që infektohen me këtë sëmundje, pavarësisht se rastet njerëzore mbeten të pakta. Arsyeja pse ata janë të shqetësuar është se përhapja e gjerë e bën më të lehtë mutacionin e virusit, i cili gradualisht mund të marrë karakteristika që do ta bënin më të lehtë përhapjen nga personi në person.
Rreziku për popullatën “mbetet i ulët”, siguroi dje CDC, e cila në këtë fazë nuk po ndryshon rekomandimet e saj për trajtimin e epidemisë