Rektorja e Universitetit të Shkodrës, “Luigj Gurakuqi”, Suzana Golemi është pezulluar nga detyra.
Vendimi është marrë nga ministrja e Arsimit, Evis Kushi, pas denoncimit nga emisioni Stop në Tv Klan të fenomenit të mitmarrjes në këtë universitet, ku ishte e përfshirë edhe vet rektorja.
Stop solli mbrëmjen e së mërkurës se prova se rektorja Golemi dhe pedagogia Donalda Laçej, që jep lëndën biokimi mjekësore për 3 degë, merrnin para nga studentët për të kaluar në provime.
Bashkëpunëtori i emisionit investigativ i zgjat zarfin me 150 Euro. Pasi e shtyn disa herë, Rektorja e vendos në tavolinën e saj dhe i premton se do i vendosë notë kaluese në provim.
Një tjetër denoncues i tha emisionit Stop se është detyruar të paguajë pedagogen Donalda Laçej për të marrë provimin e biokimisë.
Zarfin me emrin e tij ia dorëzoi në një klasë, ku nuk kishte student.
“Ka raste specifike që i është djegur diploma për shkak të këtij provimi. Nuk kanë pasur mundësi të bëjnë pagesën, i është djegur komplet diploma”thuhet në prononcim.
Një tjetër shqetësim i studentëve është dhe libri i biokimisë mjekësore, me autorë dy pedagogët, të Rektores Suzana Golemi dhe Donalda Lecajt. Sipas studentëve, ata janë të detyruar që të paguajnë 5 mijë e 500 Lekë për ta blerë këtë libër.