Nga 1 janari, siguracioni i makinës do të ndryshojë. Të gjithë ata drejtues të moshës 18-21 vjeç, ata që kanë shkaktuar aksidente apo kanë makinë me fuqi mbi 3 mijë kubik do të paguajnë më shumë. Autoriteti i Mbikëqyrjes Financiare thotë se diferencimi i sigurimit bazuar në këta faktorë risku bëhet për të ndërgjegjësuar drejtuesit e mjeteve.
Drejtuesit problematikë të mjeteve, të cilët kanë historik negativ me aksidentet, do të paguajnë më shumë për sigurimin e makinës.
Autoriteti i Mbikëqyrjes Financiare ka miratuar rregulloren e re për llogaritjen e primit të sigurimit, ku çmimet që drejtuesit e mjeteve do të paguajnë për sigurimin e detyrueshëm do të diferencohen bazuar në 7 faktorë risku.
Rregullorja u prezantua në Komisionin e Ekonomisë nga drejtuesja e Autoritetit të Mbikëqyrjes Financiare Mimoza Kaçi.
“Ka përfshirë 7 faktorë rreziku, për të cilat kemi të dhëna të disponueshme. Këto faktorë do të ndikojnë në primin e sigurimeve.
1-Historiku i dëmeve, është punuar për databazën e dëmeve në autoritet, ky regjistër furnizohet nga shoqëritë e sigurimeve dhe mbahet nga autoriteti, po punohet që edhe shoqëritë të kenë akses në këtë informacion për dëmet e një drejtuesi.
2-Fuqia motorike, sa më i lartë kubikazhi i mjeteve aq më i lartë dëmi që shkakton, dhe aq më i lartë primi i sigurimit.
3- Mosha 18-21 vjeç është mosha më e penalizuar në policën e sigurimit të automjetit.
4-Eksperienca në drejtimin e mjetit.
5-Përdorimi i mjetit, nëse është subjekt apo kompani pasi kur është mjet biznesi përdoret nga disa drejtues
6-Qarku i regjistrimit të mjetit, që ka të bëjë me incidenteve të aksidenteve sipas qarqeve.
7- Vjetërsia e mjetit”, tha Kaçi.
Rregullorja e re do të hyjë në fuqi nga 1 janari 2025, dhe sipas drejtueses së AMF-së, sigurimi i diferencuar do të ndikojë në ndërgjegjësimin e drejtuesve.
“Hyn në fuqi më 1 janar 2025, deri në fund të këtij viti ne do të bëjmë gati procesin. Kjo periudhë do të shërbejë edhe për ndërgjegjësimin e qytetarët, për të mirat që ata kanë me këtë sistem të rëndësishëm të sigurimit të mjeteve. Do të sjellë më shumë drejtim të kujdesshëm për drejtuesit e mjeteve. Çdo dëm i shkaktuar, do ti ndikojë në çmimin e policës në vijim. Përllogaritja e primit nga kompanitë e sigurimit do të jetë publike”, tha Kaçi.
Kategoria që pritet të paguaj prim sigurimi më të lartë për siguracionin e makinës do të jenë ata që kanë mjet me mbi 3000 kubik dhe ata që bëjnë më shumë se 2 aksidente në tre vitet e fundit.
“Për një dëm të ndodhur gjatë vitit të fundit, ai do të jetë i penaluzuar kur të presë policën e radhës, dhe mbas një viti ai nuk do të ketë më ndikim. Ka dhe një kategori për ata që shkaktojnë 2 ose më shumë dëme gjatë 3 viteve të fundit, faktori i riskut është më i lartë, pra primi i sigurimit. Po bëjmë një kalkulator ku çdo drejtues hyn dhe jep të gjitha detajet për veten dhe mjetit dhe llogarit primin. Me këtë rregullore e ndajmë me 7 klasa për kubikazhin e mjetit, ku mjetet me mbi 3000 kubik do të kenë faktorin e riskut me të lartë” , tha Kaçi.
Edhe ata qytetarë që makinën e tyre ja japin një personi tjetër dhe ky i fundit shkakton aksident, primi që do paguhet do të jetë më i lartë si për drejtuesin që shkaktoi aksidentin ashtu edhe për pronarin e mjetit.
“ Nëse një drejtues mjeti makinën e tij nuk e përdor vetëm vetë, por ja lë edhe një anëtari tjetër të familjes, një miku, një shoku dhe ky person shkakton një aksident, malusi i shkon jo vetëm drejtuesit që është në drejtim të mjetit por edhe vetë pronarit të mjetit” , tha drejtuesja e AMF-së.
Formula e përllogaritjes së primit të sigurimit duke marrë në konsideratë edhe rreziqet e sipërcituara është bërë nga AMF, dhe në bazë të kësaj formule kompanitë e sigurimit do të vendosin vetë tarifat e primit të sigurimit, dhe ia vë në dispozicion AMF-së 30 ditë para se t’i aplikojë ato. Nëpërmjet këtij sistemi bonus-malus ku primi do të vendoset në bazë risku synohet që të rritet përgjegjshmëria e drejtuesve të mjeteve.