Agjencia Europiane e Mjedisit rendit Tiranën mes top 10 kryeqyteteve me më shumë pemë në Europë

Agjencia Europiane e Mjedisit vlerëson se Tirana është një nga dhjetë kryeqytetet më të gjelbërta të Europës. Sipas listës së publikuar nga të dhënat e agjencisë, Tirana renditet në top 10-shen e kryeqyteteve me mbulimin më të madh urban me pemë, në bazë të popullsisë.

Tirana lë pas kryeqytete si Brukseli, Athina dhe Beogradi, por ndërkohë renditet e para mes kryeqyteteve të Mesdheut. Kjo është një arritje e rëndësishme për kryeqytetin shqiptar, i cili në 9 vitet e fundit ka përmirësuar ndjeshëm hapësirat e gjelbra, falë edhe ndërhyrjes me aksionet e vazhdueshme për mbjelljen e pemëve nga Bashkia e Tiranës.

Listën e kryeson Sarajeva, qytet i cili gjithsesi nuk është rritur në popullsi edhe pas luftës së 1994. Ndërsa, pas saj rendihen vendet baltike dhe skandinave, të cilat njihen për nivelin e lartë të gjelbërimit edhe për shkak të favorizimit të klimës.

Për lajmin ka reaguar edhe kryetari i Bashkisë së Tiranës, Erion Veliaj, i cili në një postim të tij në rrjetet sociale shkruan:

“Super lajm për Tiranën nga Agjencia Europiane e Mjedisit! Hidhi një sy këtij grafiku, për të mësuar se si Tirana listohet në top 10-shen e kryeqyteteve të Europës me mbulimin më të madh urban me pemë, duke lënë pas Athinën, Beogradin, Brukselin e plot qytete të tjera. Një arritje e jashtëzakonshme për gjithë punën e bërë në këto 9 vjet, me mbjelljen e pemëve të reja, si e vetmja mënyrë për të përmirësuar jetën e fëmijëve dhe të gjithëve. Eshtë edhe një përgjigje për shpotitjet e atyre që, çudi si nuk lodhen së djeguri goma duke ndotur mjedisin në qendër të Tiranës, por mazallah se kapin një lopatë me dorë! Forca”.

Lista e kryeqyteteve me dendësinë më të madhe të pemëve:

1. Sarajeva
2. Oslo
3. Riga
4. Tallin
5. Stokholm
6. Helsinki
7. Sofia
8. Zagreb
9. Vilnius
10. Tirana

28. Bruksel
29. Athina
30. Londra
31. Beogradi
32. Bukureshti
33. Dublin
34. Ankara
35. Amsterdam
36. Valleta
37. Reykjavik