Mëngjesin e sotëm në “Koha për t’u zgjuar” ishte mjeku veteriner Rushan Vrapi, i cili foli neë lidhje me kontaminimin e ushqimit, një nga temat më të përfolura të ditëve të fundit pas evidentimit dhe sekuestrimit të një sasie të konsiderueshme mishi me salmonelë.
Mjeku nënvizoi rëndësinë e respektimit të kushteve higjeno-sanitare jo vetëm në thertore që duhet të jenë brenda standardeve, duke u ndalur edhe tek zinxhiri i ftohjes.
“Zinxhiri i ftohjes është shumë i rëndësishëm. Mishi pas therjes së kafshës duhet të mbahet për rreth 48 orë në temperatura nën 0, zakonisht minus 4 gradë celcius. Kjo ndikon në uljen e ngarkesës mikrobike, jo 100 për qind, por që ndikon. Kjo është rëndësishme pasi edhe mënyra se si reagon trupi ynë varet nga ngarkesë mikrobike”, u shpreh ai.
Mjeku ka renditur edhe disa nga indikatorët që mund të na bëjë të kuptojmë nëse mishi të cilin po blejmë është i kontaminuar apo jo.
“Në lidhje me pamjen, një mish i freskët duhet të ketë një ngjyrë të kuqe në rozë, vëmendje duhet t’i kushtojmë edhe aromës së mishit apo lëngjet me ngjyra të ndryshme që mishi mund të ketë rreth e qark. Sa i ëprket strukturës së mishit, ai nuk duhet të jetë as xhelatinoz dhe as i fortë”, tha ai.
Vrapi vuri theksin edhe në rrezikshmërinë që paraqet përdorimi i antibiotikëve tek kafshët dhe ndikimin që kjo ka tek organizmi i njeriut.
“Problem është edhe pjesa e përdorimit të antibiotikëve në kafshë, pasi nuk shkatërrohet me gatimin, as në temperatura të larta,100 gradë. Antibiotikët janë një nga problemet më të mëdha të botës kjo edhe për faktin sepse krijohet rezistencë ndaj antibiotikëve”’, tha ai.
Leave feedback about this