Në prag të sezonit Turistik, “S’ka muzikë pas orës 00:00”, Ministria: Nuk mund të bashkëpunojnë brenda një sezoni jeta e natës edhe qetësia.

Në prag të hapjes së sezonit turistik kanë nisur dhe parapërgatitjet për një sezon të mbarë. Që pas pandemisë duket se lokalet e natës do ta kenë vështirë të mbajnë muzikë në një orar të gjatë.   Ministrja e Turizmit dhe Mjedisit, Mirela Kumbaro ka deklaruar se me futjen në fuqi të vendimit të qeverisë për vlerësimin e zhurmave në mjedis, në përputhje me parametrat e OBSH-së, bizneseve do t’iu jepet mundësia të riorjentojnë tipologjinë e aktiviteteve që duhet të ndjekin. Sipas Kumbaros, zbatimi i këtij amendamenti do të bëhet nga pushteti vendor. Bashkitë, thotë ministrja, duhet të përcaktojnë zonat e banuara ku nuk do lejohet asnjë lloj aktiviteti me zë të lartë pas orës 00:00, edhe zonat në të cilat do lejohet muzika pas këtij orari. “Normat e muzikës deri tani nuk kanë qenë të kontrolluara në përputhje me parametrat e lejuara nga Organizata Botërore e Shëndetësisë.Ne kemi pasur urdhëresa dhe akte nënligjore, por nuk ka qenë e qartë se kush i kontrollonte. Ligji i sotëm i ndërmarrë me vendim qeverie e rregullon këtë. Bashkitë do të kenë detyrimin të përcaktojnë cilat janë ato zona brenda territorit të tyre administrativ. Mund të zhvillohen aktivitete biznesi me muzikë edhe përtej orës 00:00, por që duhet të jenë larg zonave ku banohet, flihet, pushohet përtej mesnatës. Sigurisht që kjo do të sjellë një riorjentim të bizneseve në territore të tjera dhe tipologjinë e aktiviteteve që duhet të ndjekin, të cilat më herët nuk ishte e mundur. Nuk është e mundur që të bashkëjetojnë brenda një sezoni edhe jeta e natës edhe muzika, me paqen edhe qetësinë. Kjo mund të ndodh vetëm nëse respektohen të tilla rregulla. Nuk po shpikim rrotën thjesht po ndjekim rregulla që ndiqen në vendet e tjera të BE-së”- tha Kumbaro.