Ministrja e Turizmit dhe Mjedisit, Mirela Kumbaro deklaron se “jehona e prezantimit të Shqipërisë në ITB Berlin, panairin më të madh të turizmit në botë, vazhdon të ngjallë interes”.Kumbaro ka publikuar në rrjetet sociale foto dhe detaje nga takimi i zhvilluar një ditë më parë në Ministrinë e Turizmit dhe Mjedisit me një përfaqësi të anëtarëve të Shoqatës së Tour-Operatorëve gjermanë (DRV), kryesuar nga Presidenti Norbert Fiebing.Në këtë takim merrnin pjesë edhe drejtuesit e disa prej sipërmarrjeve turistike më të rëndësishme gjermane, për të ndërtuar bashkëpunime edhe më të suksesshme në të ardhmen.Kumbaro deklaron se në vitin 2022, mbi 188 mijë vizitorë gjermanë zgjodhën Shqipërinë për pushimet e tyre, tendencë që vazhdon edhe këtë vit duke e kthyer tregun gjerman ndër më të rëndësishmit për turizmin shqiptar.Ministrja ka bërë të ditur se 83% e kapaciteteve turistike janë tashmë të rezervuara për vitin 2023 në Shqipëri.Vizita disa ditore e përfaqësuesve më të lartë të Shoqatës së Tour – Operatorëve gjermanë (DRV), dhe drejtues të Agjencive Turistike u organizua nga Agjencia Kombëtare e Turizmit, të cilët erdhën në Shqipëri të nxitur nga interesi i lartë i turistëve gjermanë për të parë nga afër potencialin e madh turistik që ofron vendi ynë. Të shoqëruar nga Drejtoresha e Agjencisë Kombëtare të Turizmit, Zana Çela, Tour – Operatorët gjermanë vizituan mjediset e Shkollës së Mesme Profesionale “Salih Ceka” në qytetin e Elbasanit ku u pritën nga Kryetari i Bashkisë së Elbasanit, Gledian Llatja. Ai e vlerësoi këtë investim të rëndësishëm të qeverisë shqiptare në bashkëpunim edhe me donacione të qeverisë zvicerane dhe gjermane, ku studiojnë 600 nxënës, ndër ta, 200 në degën Hoteleri – Turizëm si dhe në kabinetet e rrobaqepësisë, vendosjes së paneleve diellore, atyre foto voltaike, termo-hidraulikës. Mes rivierës së bukur shqiptare dhe trashëgimisë kulturore, përmes sugjerimeve të destinacioneve kryesore të Agjencisë Kombëtare të Turizmit udhëtimi vijoi në Gjirokastrën e UNESCO-s me një shëtitje në Qafën e Pazarit, në sokaket e bukura me kalldrëm, ndalesat në Muzeun Etnografik, shtëpinë e shkrimtarit tonë të madh Ismail Kadare, ku miqtë nga Gjermania u pritën nga Kryetari i Bashkisë Z. Flamur Golemi. Në kalanë e Argjirosë, Tour – Operatorët gjermanë shijuan ritmet dhe tingujt e Festivalit Folklorik Kombëtar. Më pas vizita në Butrint, pasuri e Trashëgimisë Botërore të UNESCO-s la përshtypje mahnitëse tek Tour – Operatorët gjermanë, të cilët e konsideruan këtë sit arkeologjik të Shqipërisë si një ofertë elitare për turistët gjermanë. Në përfundim të vizitës në Shqipëri, Shoqata e Tour – Operatorëve gjermanë zhvilloi edhe një takim me disa prej drejtuesve të Shoqatave të Tour – Operatorëve dhe hotelierë shqiptarë, të cilët prezantuan shërbimet në disa prej hoteleve në bregdetin e Golemit në Durrës dhe shprehën interesin e tyre për të bashkëpunuar me Shoqatën e Tour – Operatorëve gjermanë në promovimin e Shqipërisë turistike dhe mikpritjen e turistëve gjermanë në Shqipëri. Drejtoresha e AKT-së, Zana Çela shpalosi si një vlerë të shtuar për turizmin shqiptar, Kalendarin Kombëtar të Eventeve të Turizmit Kulturor dhe Traditës dhe Aplikacionin TEA (Tourism Events of Albania), i cili u jep mundësi turistëve të eksplorojnë nga telefoni celular e bëhen pjesë e aktiviteteve kulturore, të trashëgimisë, sportive e artistike duke i përzgjedhur sipas preferencës, grupmoshës, datës apo destinacionit. Aplikacioni TEA tashmë përmes bashkëpunimit me Shoqatën e Tour – Operatorëve gjermanë do të jetë pjesë e ofertave turistike të Agjencive gjermane të turizmit.
Leave feedback about this